O se alii e 52 tausaga na mafua ai se mataupu i Albert Park i Aukilani na tapunia ai nisi o fale tetele ma aveesea mai ai faavavave tagata, ua molia le faia o ni faamatalaga sese.
Ua faailoa e le RNZ i le asō na tali ane leoleo i le mataupu lea i Albert Park ona o ni faamatalaga faapopole tagata na faia e le tagata lea.
Fai mai na aveesea uma mai ai tagata sa i fale i Princes Street ma Bowen Lane faapea foi Albert Park.
Na ave e leoleo le tagata lea e fesiligia ma vaaia ai mulimuli ane le toe tatala o fale ma vaega sa faasā e leoleo atoa ai ma le poloka o le alatele.
O le faamatalaga a leoleo e faaafetaia le onosai o tagata lautele i lenei mataupu ma ua faailoa o loo faatalanoa pea ma le tagata lea ae o gaioiga na faatino ananafi e mo le faamautinoaina o le saogalemu o le atunuu.
O le asō ua fuafua e tulai ai lē ua molia i le faamasinoga faaitumalo i Aukilani atonu o le a tau malamalama mai ai poo ā tonu ana faamatalaga na fai.
