O le asō e tula’i ai i le faamasinoga i Brisbane se alii mai Amerika lea o loo laumanu’ia lona taumafai e aumai faananā le fuālaau faasāina o le cocaine i Ausetalia nei e faaui mai i ni fagu shampoo ma conditioner ae maua lelei i le malaevaalele i Brisbane.

O le aso 26 o le masina na te’a nei o Tesema na fai ai se sa’iliga a le Borderforce i le malaevaalele lea e faaaogā ai ta’ifau ma taofia ai le alii lea e 33 tausaga na malaga mai Amerika.

Na maua ai i lea su’esu’ega se fagu shampoo 946ml ma le fagu conditioner e tutusa lelei size ma faamaonia ai o le cocaine o loo iai totonu.

Fai mai lipoti pe ā ma le 2.2 kilo le cocaine ma a faatauina e ono oo i le $880 afe e maua ai.

Na molia ai loa e leoelo ma afai ae faamaonia moliaga e ono falepuipui mo le oo atu i le 25 tausaga.

O loo i le vaaiga pea a leoleo e tālia ai le tula’i i le faamasinoga i le asō.

Puna o Faamatalaga: https://www.9news.com.au/national/us-man-charged-for-alleged-attempt-to-smuggle-cocaine-into-australia-in-shampoo-conditioner-bottles/3565e973-832d-4843-8203-6d5a8444b3ef