Ua pue e leoleo ma molia se alii i le faatupuina o se afi na sasao ane i se faletalimalo i Aukilani lea o loo api ai le ausoka a tamaitai Niu Sila le Football Ferns.
O se lipoti lata mai a leoleo e pei ona faailoa i le 1News ua ta’ua ai e 34 tausaga o le alii lea ma ua molia i le gaoi ma le susunufale ma o le asō sa fuafua e tulai ai i le Faamasinoga Faaitumalo i Aukilani.
E le o iai ni lipoti o sē ua aafia i lenei faalavelave ae o se pepa o faamatalaga mai le NZ Football ua ta’ua ai ua aveesea lē tumau le ‘au mai le faletalimalo lea le Pullman, o le nofoaga sa faatulaga e avea ma o latou nofoaga autu mo le Ipu o le Lalolagi.
Ua faamaonia o loo saogalemu uma le ‘au ma le aufaigaluega.
Na tulai mai lea faalavelave i ni nai aso talu ona malo Niu Sila ia Norway i Eden Park.
O le Aso Lua o le vaiaso fou e fetaui ai le Ferns ma le ‘au mai Filipino i le taaloga e faia i Ueligitone.
