E lei atoa se 24 itula na faasalalau ai e leoleo ata o ni mafine se toalua sa manaomia e le ofisa suesue faapitoa ni faamatalaga mai le atunuu e sailia ai afioaga e faamautu ai, ae oo i le taeao o le Aso Lulu agai atu ia tamaitai i le ofisa o leoleo.
O le feiloaiga a tusitala ma le sui komesina o leoleo na faamaonia ai o ia ata na pueina e se masini pueata a se faleoloa e faatau ai asoa ma isi teuga poo se jewellery shop.
O le afiafi po o le Aso Lulu na faailoa e leoleo ua molia le toatasi o i laua ia, ma o se tamaitai 32 tausaga le matua mai le nuu o Laulii.
Ua molia i le tagovale ma o le aso 31 o Ianuari o le tausaga fou e tulai ai i le faamasinoga.
Ua tatala o ia i tua i aiaiga e saini i le ofisa autu o leoleo i Aso Gafua o vaiaso taitasi.
I le solitulafono o le fasioti tagata paivalea ua molia ai se tina 37 tausaga le matua, ona o le maa na ia togi ai lona atalii e 11 tausaga ae alu atu le maa lavea ai le ulu o lana tama teine 13 tausaga ua maliu, ua faaalia e le sui Komesina o leoleo ia Papalii Monalisa Tia’i Keti, o le sao o le palapala i le ulu o le teineititi le mafuaaga o le fano o lona ola.
O le taunuuga lea o suesuega faafomai. O le Aso Gafua asau e tulai ai le tina i le faamasinoga e tali i moliaga o le fasioti tagata paivalea, ma le umia o se aupega matautia.
