O le susuga Ioelu Iosefa, o se alii ofisa sinia o le Matagaluega o Faatoaga ma Faigafaiva, sa aoaoina i Isaraelu le nuu paia o loo talitonu iai le au Kerisiano, i tomai i le faatuina o nofoaga e gaosi ai le kesi mai otaota o manu ma otaota lafoai.
O lea tomai na faaaoga e Ioelu ma se tasi o ofisa sinia o lea matagaluega, e fausia ai nofoaga e gaosia ai le kesi ogaumu e maua i otaota o manu ma otaota lafoai e pei o toe meaai e totoe, ma isi otaota lafoai e pei o pa’ufa’i ma valusaga.
Na faamatala e Ioelu i le mamalu o le afioaga o Faleaseela na molimauina le amata faaaoga o le kesi ogaumu mai ia otaota lafoai, auā le silafia e aiga ua amata faaaoga lea fesoasoani, le tāua o le tausia lelei o nofoaga e maua ai lea ituaiga o kesi ogaumu.
Le susuga Ioelu Iosefa, o se ofisa sinia o le Matagaluega o Faatoaga ma Faigafaiva o loo galue i le fausia o nofoaga e gaosia ai le kesi ogaumu mai otaota lafoai.
O le uluai taumafaiga i lea fesoasoani mo Faleaseela, ua taoto atu ai le talosaga a matai o le nuu i le UNDP mo nisi nofoaga faapea e fausia ma faateleina ai aiga e maua lea kesi ogaumu, ma lē toe alu ai ni seleni i le kesi masani o loo faatau mai i kamupani o loo maua ai lea oloa i Samoa.
