Ua toe aliae foi se tasi mataupu e pei o le mataupu na tupu i NSW, o le taimi nei la o Adelaide ua lipotia mai ai se alii ua molia e leoleo i le gaoi, faaoolima ma le faaalia o amio lē taupulea i le IGA i Adelaide i le aoauli ananafi.
O Benjamin Devitt 46 tausaga na pue e leoleo i fafo ane o le IGA i Franklin St i le taulaga faatau i Adelaide, poo le ta o le ‘afa o le 5 i le afiafi ina ua feta’ua’ina lona taumafai e gaoia ni oloa mai le faleoloa.
Maua lelei i meapueata le taimi na osofai ane ai e Devitt le aufaigaluega a o taumafai atu e taofia lana gaioiga sa tau fai.
Ua saunoa ai le komesina o leoleo ua faatupulaia lenei amio ma ua oo i se tulaga faapopoleina.
O loo taofia pea Devitt e leoleo e tulai i le faamasinoga i le vaiaso fou ma faatalia ai se faaiuga pe mafai ona tatala i tua. Faamatala e se tasi o molimau i talafou, e fou foi i le vaai ituaiga gaoi fou lea ua taatele mai, a maua le gaoi, e lē faatoese ae oso faamaimalosi le faalii ma fia fusu i tagata.
