I isi foi tala mai lologa i Aukilani ua lipotia ai le pueina o se alii e 57 tausaga ua feta’ua’ina na maua atu o ia gaoia oloa mai se tasi o faleoloa i le Wairau Valley i Aukilani, fai mai leoleo na pueina o ia i le ‘afa o le 8 i le po anapo ina ua o latou maua lipoti fai mai o se alii ma se tamaitai o loo la la’uina uta o oloa i totonu o se van, sa sailia e leoleo lea taavale ma maua ai ma nisi o oloa gaoia mai foi i se isi faleoloa lata ane sa aafia foi i lologa.
Fai mai leoleo e matuā maualalo tele ia ituaiga amioga aemaise o le gaoi mai i nisi o loo faalogoina foi mafatiaga mai lologa ma mea ua faaleagaina.
O le faaitu lea o Wairau na maua iai isi tagata e toalua ua maliliu e atoa iai le toafa ua faamauina le ma’umau o soifua i lea faalavelave faalenatura.
Ua ta’ua mai e leoleo o le alii la lea o le a tulai i luma o le faamasinoga faaitumalo i North Shore e tali i ona moliaga ae o le tamaitai ua mae’a ona tuuina iai se lapataiga e leoleo.
