Ua agavaa nei tagata uma o Kuiniselani e fai tuipuipui o le flu e aunoa ma se totogi i se taumafaiga a le setete ma le faigamalo e faaitiitia aafiaga o le vairusi ua pepesi e aafia tele ai le fanau.
O se teineititi 11 tausaga mai le Sunshine Coast na uma le ola i le influenza B ma le toatele o tamaiti Kuiniselani o loo taofia i falemai talu mai le amataga o le masina.
O le faamatalaga mai le ofisa sili o le soifua maloloina i Kuiniselani, John Gerrard e faapea o le popolega lava e faatatau i aafiaga o le flu i tina ma’itaga ma tamati i le vaitau lenei.
O le tausaga muamua lenei talu mai le 2019 ua maualuga ai le aofai o tagata e aafia i le influenza B mai Kuiniselani, ma fai mai e tau māmā atu aafiaga i tagata matutua nai lo tamaiti.
O lea la ua ofoina ai e le soifua maloloina le faia fua o tuipuipui o le flu ia malupuipuia ai tagata uma auā fai mai a latou e leiloa lava le agai atu i le lumanai ma aafiaga o nei ituaiga vairusi.
