O le ‘au lenei a le Penrith Brothers mai Ausetalia o le aulakapi liki a fanau i lalo o le 13 tausaga le matutua lea sa faafeiloai e le Aoga Tulagalua a Gataivai i le motu tele i Salafai i le aso ananafi ma faatino ai la latou taaloga.

O lenei malaga o se asiasiga mai i Samoa e maimoa i le faatinoina o tu ma le aganuu faa-Samoa ae peitai o se avanoa foi lea e faatino ai ana taaloga i nisi o ‘au mai fanau aoga a le atunuu.

Na faailoa e le Faiaoga o le ‘au ia Jim Tutton o le toatele o le aumalaga lenei o fanau aoga ma mātua o le taimi muamua lenei ua tuvae mai ai i Samoa.

“O le tausaga 2019 sa matou omai ai foi ma nisi foi o fanau aoga na aumai ai la matou ‘au ae o le avanoa lenei na tuuina atu ia i matou ia Me o le tausaga nei ma na matuai galulue malosi mātua ma fanau nei e ala i sailigatupe ina ia mafai lava ona aumai fanau nei i Samoa.”

Na ia ta’ua ai le tulaga maoa’e o le maitau i le talenia o fanau e ala i le taaloga ananafi ma le ‘au mai le Aoga Tulagalua a Gataivai.

“Ina ua mae’a le taaloga ananafi na fai lava si maualuga o le laasaga o le malamalama o fanau nei i le faatinoina o le taaloga, o tulafono o metotia e maua ai le polo e iloa uma e tamaiti nei fai.

“E faafetai ai foi le NRL Samoa i la latou pitolaau i le taumafai ina ia atina’e fanau mai lava i le laititi ma e iai le talitonuga a faaauau pea lenei matafaioi e le taumate le faigofie ona faafoe fanau nei i le taaloga o le liki pe a oo ina matutua.”

O se fiafiaga tele lea i le ‘au lenei mai Ausetalia le sagisagi fiafia o alo ma fanau a le aoga e faafeiloai i latou.

“Sa talia lava lenei faamoemoe mai le fia o masina ua leva ona fia omai tamaiti nei i Samoa ae oute faafetai o lea ua faataunuu le oo mai ua vaai ai ma silasila i le tulaga o le faatinoina o tu ma le aganuu a Samoa e pei ona iai le ava o feiloaiga i le aso ananafi, o le tumutumu o le afioaga e tapuaia foi taaloga a nai tamaiti o se vaaiga manaia tele lea mo matou.”

O loo faagasolo nisi o polokalame a le ‘au i Savaii e asia ai nisi o afioaga aemaise o mataaga.

“Sa faatau mai jerseys e le matou ‘au e tuuina atu lea i le ‘au a le aoga sa taaalo ananafi ae le gata i lea o nisi o mea taalo e fai meaalofa ai i nisi o afioaga o le a asia i lenei aso.”

O le aso a taeao lea o le a toe taliu mai ai i Upolu nei e asia nisi o mataaga ma tapena ai mo la latou taaloga i le Aso Faraile nei ona toe sauni ai lea e toe malaga atu i Ausetalia i se aso o i luma.