O loo mataitu e leoleo i Aukilani fiafiaga a tagata Samoa ma Tonga i le faaiuga o le vaiaso.
O le faatasiga tele anapo i Magele na vaaia ma faalogoina ai le faa’e’e o pu o taavale ma fireworks i le valuapo a o lei amata le taaloga i le ‘afa o le tolu i le vaveao analeila.
O ia fiafiaga na uma Magele ae faaauau i Otara.
I lipoti o lea na faatā’ape e leoleo le faatasiga tele na faia i le Aso Toonai, lea e le gata o fireworks, faa’e’e pu o taavale ae faapea ai ma le nonofo ma tutu i luga o taavale o loo alu.
O le faatasiga i le po o le Aso Toonai e tusa ma lipoti a le Newshub e faapea pe a ma le afe tagata ia na iai.
Mai le ofisa o leoleo i Manukau o lea na faaopoopo leoleoga a leoleo i Aukilani i Saute a o taumafai ai ia mautinoa o loo malupuipuia tagata uma sa iai i ia fiafiaga.
O lea foi na galulue faatasi le ofisa ma sui faipule, o local board, taitai o le komiuniti faapea le asosi o pisinisi ina ia faia uma nei fiafiaga i se auala e saogalemu ma leai se vevesi.
A o pisi ai la leoleo i Aukilani, o lea foi na maua e tala fou anapo i Samoa, o le tulaga lava foi lea na iai le faaiuga o le vaiaso.
