Ua lipotia mai nei e le ABC Pacific le maoa’e ma le mata’ina o le aulakapi a tamaitai o le Penina Pasifika.
Faamauina i lipoti, o se vaaiga uigaese i le toatele le matautia o lenei ‘au, pe a faatusa o le toatele o tamaitai o loo faia le ‘au lenei, o tamaitai e lei taaalo faapolofesa muamua mai Samoa ma Tonga.
Ma o se ‘au na faate’ia kalapu iloga i le lakapi mo tamaitai i Ausetalia ia latou taumafaiga.
I taaloga a le Penina Pasifika na māua ai le mata’ina o taumafaiga a le ‘au a tamaitai i lana taaloga ma le Queensland Reds, ma le ‘au a le Brumbies.
E ui e lei manumalo i ana taaloga uma e lua ma ia ‘au, ae sa matuā iloga le tulai mai o le Penina o le Pasifika i le faatinoga o ana taaloga, aemaise e puupuu lava se taimi na tuufaatasia ai tamaitai o le ‘au.
O le faaiuga o le vaiaso nei o le a taaalo ai ma le ‘au a le Waratahs i lana taaloga mulimuli.
Mo le silafia o le ‘au a le Penina Pasifika o se ‘au na mafai ona tuufaatasia e ala mai le polokalame a le PacificAus Sports programme a le malo o Ausetalia.
