Na taunuu le ‘au manumalo o le taamilosaga faavaomalo a le Vailima Malisi le Ott Constructors Tamauli i le motu tele i Salafai i se faataliga mata’ina a le afioaga o Salelologa e faafeiloa’i ai le latou aulakapi ta’ito’afitu. 

E pei ona silafia o le ‘au ta’ito’afitu a le Tamauli na manumalo i ‘ai e 14-12 ma faato’ilalo ai le ‘au malosi a le BBE Vaiala i le sailiga siamupini o le ipu autu. 

Na vaaia le sagisagi fiafia o sui o le afioaga e faatali le latou aulakapi ina ua taunuu atu i Savaii i le vaa a le Lady Samoa II. Faailoa i lipoti a le Samoa Global na lagona e tama taaalo ma le pulega a le ‘au a le Tamauli le agaga faagaeetia ma le faafetai ona o le maoa’e o le tali mai a le latou nuu i le toe taliu atu ai ma le manumalo o le taamilosaga. 

Na o latou ta’ua foi o soo se faiva e tapua’ia e i’u manuia ma o se faalogona e ese le matagofie i le taunuu atu ai ae o loo faatali fiafia mai si o latou afioaga.