O solitulafono e pei o le mataifale, pule lē uma, faiaiga fai faamalosi ma le faaoolima mataga, o le matau a le faamasinoga oni solitulafono ua pepesi faa faama’i i Samoa ma ua aafia ai tele le saogalemu o alo ma fanau teine laiti.

O le finagalo o le afioga i le faamasino sinia o le Faamasinoga Maualuga, e pepesi faama’i pei o le fiva o ponaivi le dengue fever ma isi ma toe mou atu, ae o le faama’i o ia soligatulafono ua molia ai tama tane i latou ua matutua, ua sasao faaafi.

Na faailoa lea finagalo o le afioga i le faamasino sinia le afioga Vui Clarence Nelson i le lauina o le faasalaga o se tamā e 40 tausaga le matua ua faamaonia lona moliaga o le mataifale ma le faiaiga faamalosi i lona afafine moni e 13 tausaga le matua, o le la fanau e toaono.

O lē na aafia o loo aoga i se kolisi maualuga.

O le faasalaga o lea tamā e 15 tausaga i le falepuipui.

O faamaumauga a leoleo o loo faailoa ai e 2 moliaga o le faiaiga faamalosi ma moliaga e 4 o le mataifale na ioeina uma e le tamā.

O taimi uma na tupu ai ia solitulafono o loo toesea le tina o le teineititi i le po ona o le taaloga o le bingo.

E alu le tina i le taaloga ae faamuli le tamā ma le fanau e aofia ai lē na aafia ma isi alo tamaitai e toalua o le ulugalii.

O le tina lava na ia ta’u i leoleo le solitulafono ma faia ai loa suesuega ma molia lona toalua.

I le faaiuga tusitusia a le faamasinoga o loo faailoa ai e le teineititi e faapea na faato’ā maua lona mapusaga mai gaioiga a lona tamā, ina ua nofo i le vaaiga a le Toomaga mo ē Puapuagatia.

Ua faatonuina e le faamasinoga le faamauina o le suafa o le tamā ua faasalaina i le lesitala o tagata ua faamaonia moliaga i solitulafono tau faiaiga.

Ua aveesea foi lona aiā faamatua mai lona afafine na aafia faapea isi ona alo teine.