E talitonu leoleo o si alii lea na maua atu i le alatele ua maliu e foliga na lavea i se taavale ae lei tu ane le taavale lea i le taimi o le faalavelave.
Na valaau ane leoleo i le fetaulaiga ala i Pritchard St ma Hemphill Avenue i Mt Pritchard poo le ta o le tolu i le vaveao.
Fai mai e ui i galuega laveai na faia e le aufaigaluega a le taavale a le falemai peitai na maliu lava lea tagata i le nofoaga na taoto ai.
O le tala a leoleo e talitonu na lavea i se taavale ma e lei tu le taavale lea ae o le isi avetaavale na pasi ane i le nofoaga lea sa ia iloa atu lea tagata ma valaau ai loa le fesoasoani faavavave.
O le taimi nei o loo faagasolo le suesuega a leoleo, e lē o iloa poo ai lea ua maliu ae fai mai isi lipoti e foliga e 20-30 tausaga le matua.
