O le sailiga seleni a le Kaakia Mai ma le 4SJC88 MA USO sa faia i le taulaga faatau i Otara i le Aso Toonai ua mavae, na vaaia ai le maoae o le lima foai ma le agalelei o le atunuu e ala ia latou seleni na lafoina faatasi ai ma meaalofa sa tusia ona o le fia faitaulaga mo nai tagata matutua i Mapuifagalele i Samoa.
Ua fā ai nei o tausaga talu ona faataunuuina lenei galuega fesoasoani mo tagata matutua i Mapuifagalele, ma o le tausaga lenei ua maitauina ai le maoae o le agalelei o le atunuu i Aukilani i lenei faamoemoe.
O alo pepese o le atunuu sa ofoina le latou taleni pese e faatinoina ai lenei polokalame, ina ia faamalieina le faafofoga a le atunuu a o agai atu e tusia a latou foai.
Na faatumulia le taulaga faatau i Otara i le taeao i aiga ma fanau sa agai atu e lagolagoina lenei faamoemoe, ae le gata i lea o faafiafiaga sa tuu atu ai le tau’au o tama ma teine tuai o le Kolisi o Samoa e fesoasoani ai i le sailiga seleni.
E $13,000.00 NZ sa maua i le agalelei ma le alofa tulai o le atunuu i le Aso Toonai, ma ua faaliliuina i le tupe Samoa ma maua ai le $20,000.00 Samoa.
Faatasi ai ma le lagolago a le Pacific Ezy Money a le afioga ia Faimalo Allan Stowers e $15,000.00 Samoa ma le Moana Rental e $15,000.00 Samoa lea na maua ai loa le $50,000.00 SAMOA.
Ma o le seleni lea sa tauaaoina sa’o atu loa i le Aso Toonai i le afioga i le tamaitaisa ia Sose Stowers auā le faamoemoe mo nai tagata matutua i Mapuifagalele.
Na lagona le agaga faafetai o le komiti a le KAAKIA MAI ma le 4SJC88 MA USO i le faamoemoe sa iai ona o lea ua savali i le 4 tausaga talu ona faatautaia lenei polokalame ae o loo maitauina lava le agai i luma ma le siitia o le foai a le mamalu o le atunuu.
Faailoa e le susuga ia Filipou Pinati Williams ua taugata le soifuaga ae o le agalelei ma le tali valaau o le atunuu e ese ma le loto foai ma le faitaulaga.
Ma e momoli ai lava le latou agaga faafetai ia Samoa i Aukilani faapea alo pepese o Samoa i le latou galuega fau faatasi lea ua matagofie ai le seleni ua ofoina mo Mapuifagalele i lenei tausaga.
