I le tolu tausaga talu ona faia le faaiuga a le pulega o le Iunivesite Aoao o Samoa e faamuta le konekarate a se tasi o Pule Sili Lagolago o le iunivesite sa faauluulu iai le vaega o auaunaga lautele le corporate services, o le Aso Tofi o lenei vaiaso na aumai ai le faaiuga a le faamasino sili le afioga Satiu Simativa Perese, ua faatonuina ai le pulega o le Iunivesite a le atunuu ina ia totogi uma faamanuiaga tau tupe mo lē na faauluina le tagi faasaga i le iunivesite ma le faamutaina o lana konekarate, le afioga Maugaoalii Uafagalilo Faamanū Diana Mualia.
Ua talia e le faamasinoga le finauga a loia a lē na tagi, o le faaiuga na faia e faamuta le konekarate e sese ma lē sa’o.
O Aokuso o le tausaga e 2019 na logoina ai e le iunivesite Maugaoalii ua faamuta lona toe avea ma Pule Sili Lagolago poo le deputy Vice Chancellor o auaunaga lautele ona o le taunuuga o se suesuega a se soa komiti na filifilia e le iunivesite na toe iloilo ai matafaioi tauave mo lea tofiga.
E lē itiiti ifo ma le $179,338 tala le faamanuiaga tau totogi ua faatonuina i le faaiuga a le faamasinoga e totogi atu i lē na tagi, peitai ua lē talia e le faamasinoga le finauga a Maugaoalii e ala i lana loia, mo se taui ona o aafiaga o lē na tagi i le faaiuga na motusia ai lana auaunaga i le iunivesite aoao a Samoa.
Le afioga Maugoalii Ufagalilo Faamanu Diana Mualia.
Ua faatonuina e le faamasinoga maualuga i lana faaiuga le feutagai o loia a itu na auai i le suesueina o le mataupu e soalaupule ai le totogi poo legal costs.
Ua faatonuina a lē maua se autasiga i lea tulaga ona tuuina atu lea o ni finauga poo submissions i le faamasinoga e iloilo ai se faaiuga mo lea vaega tāua o le faamasinoga.
