O le tausaga 2020 lea na amata faaaoga ai le auala laupapa fou i Vasigano lea sa toe fausia e se tasi o kamupani a Iapani le Konoike Construction Co. Ltd ma faatupeina i se maliega na sainia e le Malo o Samoa ma le Malo o Iapani i le 2017.

O le poloketi lenei na manumalo ai le kamupani lenei faatasi ai ma le Central Consultant Inc i vaega o poloketi fausia i le tufatufaga faailoga a le  6th Japan Construction International Award lea na faatautaia i Tokyo.

O le Amepasa o Samoa i Iapani Faalavaau Perina Jacqueline Sila-Tualaulelei na auai i lenei faamoemoe ma avea ai ma sui o Samoa e faia sana saunoaga e momoli ai le faamalo i lenei kamupani mo lenei faailoga.

O lenei poloketi na lagolagoina ma fausia i se taimi vave ona o le tele o afā i tausaga ua mavae aemaise ai le aafia ai o lenei alalaupapa i le afā matautia o Eveni i le 2012 ma o se tulaga ua faaleagaina ai atina’e tetele a le atunuu.

“O le auala laupapa i Vaisigano o se tasi lea o auala e tāua tele i le itu tau femalagaa’iga o loo sosoo ai le uafu faavaomalo i Matautu ma le taulaga, o nofoaga o le tele o pisinisi ae le gata i lea o aiga o loo aumau ai.

“O le auala laupapa muamua na fausia i le 1953 ma o loo silafia uma e le mamalu o le atunuu le fia o tausaga sa feagai ai ma faalavelave faalenatura e pei o afā ma ua tele ina faaleagaina nisi o vaega ma iai le manatu ua le toe saogalemu mo le faaaogaina i femalagaa’iga.

“O le faatinoina o lenei poloketi e tauala mai i le Malo o Iapani ma le ofisa a le JICA o lenei galuega o se sao tele lea mo le saogalemu o Samoa mai faalavelave faalenatura i ona auala femalagai e siitia ai foi le tulaga o atina’e ua ausia e ala lea i atina’e faaauau.”

O lenei galuega sa galulue soosoo tau’au ai le kamupani na fausiaina lenei poloketi faatasi ai ma le Pulega o Felauaiga i le Laueleele.

“O le tausaga lenei e atoa ai le 50 tausaga o faigapaaga faavaomalo a le Malo o Samoa ma le Malo o Iapani e avea ai lenei avanoa e fai ai a’u ma sui o le Malo e momoli ai le faafetai i le Malo o Iapani i le tele o fesoasoani o loo sasaa atu auā le atina’eina o le tamaoaiga ma ona tagata.

“O lenei foi faailoga e manatua ai le Afioga Tapunu Papalii Niko Lee Hang o lē sa avea ma Minisita o Galuega ma o ia foi lea sa taimua i lenei poloketi i lona faatinoina.”