I le mae’a o le tolu o aso o talanoaina ma felafolafoa’i sui mamalu o le Fono Aoao Faitulafono a Samoa i teuteuga o le tulafono autu o faigapalota 2019, o le mae’a o saunoaga a le toatele o faipule na salani i le saunoaga lagolago a le taitai o le Itu Agai, na taualuga iai felafolafoa’iga.

Na saunoa le taitai o le Itu Agai ma ia faailoa lona lagolagoina o teuteuga, ona o loo ia silafia le tele o lavelave ma faaletonu sa tutupu i palota a le atunuu ua mavae, ona o le lesitalaina o tagata palota.

O le saunoaga foi a le susuga Tuilaepa L Sailele Malielegaoi, na salani ai i le filemu le tele o to’a ma atugaluga sa faaleo e nisi o faiupule o le Itu Agai ona o le faatulai atu e le faigamalo o teuteuga fou, aemaise lava i le lesitalaina o tagata palota i Samoa ma atunuu i fafo i le faaaogā o fesootaiga televavave faaonapo nei le online system.

Sa tele atugaluga i lea suiga, ae na faamalamalama e le Minisita e ana teuteuga le afioga Faualo Harry Schuster, e lē tupu faaletonu ua faaleo, ae o le a silasila iai le ofisa o faigapalota.

O le galuega o le a faatino i aiaiga fou ua pasia o le a faaofi i le tulafono autu, o le tuuina lea o suafa uma ua maea lesitala i le faavaa poo le system fou, lea e manaomia ai le toe pueina uma o ata o tagata palota ma tuuina atu o latou tulagalima poo finger prints.

E lē gata mo tagata i atunuu mamao ae o tagata i Samoa.