O le a lē galo ae manatua pea le tofa i le Tootoo ia Lolo Matalasi Moliga sa avea ma ta’ita’i o le faigamalo a Tutuila ma Manu’a i le tofi Kovana Sili, i lona sao i le faatumau o sootaga o Samoa ma Amerika Samoa, e lē gata i gafa ma sootaga o aiga, ae o le gagana faapea tatou tu ma aganuu.
O se vaega o le molimau faapitoa a lē sa avea ma Kovana Sili o Amerika Samoa i le sauniga faalemalo o le tuumalo o lea ta’ita’i o le faigāmalo a Tutuila ma Manu’a le afioga Lemanu Peleti Mauga, na ia faailoa ai le sao o Lolo i le faatumauina o sootaga o Samoa e lua a o avea ma ta’ita’i o le faigāmalo i Sasa’e.
E lē gata o le faaolaola o le tatou gagana ae o tu ma aganuu, o lea foi ta’ita’i sa ia talia le mana’o o le afioga i le Tui Atua Tupua Tamasese Efi e fia oo i eleele o le Motusa poo Manu’a.
O se vaega o le molimau faapitoa a le afioga Lemanu Peleti Mauga sa avea ma Kovana Sili o Amerika Samoa.
O le sauniga faalemalo o le tuumalo o le tofa i le Tootoo ia Lolo Matalasi Moliga sa faia i le Aso Lua i Tutuila ma Manu’a ae o le Aso Lulu i Samoa, sa auai le Palemia o le malo tuto’atasi ma lona faletua.
Sa molimauina i faasalalauga mai le teritori le faatino ai o le faaaloalo a le Ta’ita’i o le tatou malo i tulaga masani o le tatou aganuu na tatala ai ie o auafa ona o le tuumalo o lea ta’ita’i o le malo o Amerika Samoa.
