O le amataga o lenei vaiaso fou ua faia ai toe sauniga o ni tamalii o le atunuu sa lotolotoi i galuega ma tonu fai o le faalapotopotoga tuma’oti o le Toomaga mo ē Puapuagatia, le tofa i le igoa matua Ale Tiatia Paepae Kaio Komiti ma le afioga Tuisugaletaua Sofara Aveau.
O ia tamalii sa lagolago malosi i le galuega fesoasoani a le Toomaga mo ē Puapuagatia o le tuuina atu o le laveai i fanau ua sauaina faapea tina ua aafia i sauaga ma isi mafatiaga o le olaga ona o le mafutaga faaleulugalii ma le tamā.
O le afioga Tuisugaletaua Sofara Aveau sa avea ma faatamā o lea faalapotopotoga o se tofiga na ia amata tauave a o avea ma sui faipule o le Palemene ma seei ai i le tofi minisita o le Kapeneta.
E tele nisi o galuega a le Toomaga sa ia taulamua ai i le sailia o fesoasoani e pei o nisi o fale na fausia i le nofoaga o le faalapotopopotoga i Tuanaimato ua faamautu ai fanau ua sauaina.
O le tofa Ale Tiatia Paepae Kaio Komiti o se tamalii e umia agavaa aoaoina i le kamuta ma le faufale ma sa ia faaaogā ia tomai ma agavaa e fesoasoani ai i le Toomaga i ana galuega tau fale.
Sa avea ma uluai sui o nuu ma afioaga i totonu o le komiti faatonu a le faalapotopotoga.
O se tamalii foi sa tapatapa iai le Peresetene le faletua o Siliniu Lina Chang i se fautuaga i ni galuega e fia faatino i totonuu o nuu ma itumalo, aemaise lava i le sailia o ni fesoasoani mai le atunuu mo galuega faatino a le Toomaga mo ē Puapuagatia.
