O le faia o amioga matagā, faaoolima i isi tagata ma le tagofia o le ava malosi o nisi ia o faafitauli o loo aliae mai i tagata Samoa o loo galulue i galuega faavaitaimi i Niu Sila ma Ausetalia, ma o se itu ua faaleo ai le faanoanoa o le Minisita o Tupe ma Galuega Faavaitaimi.

Faaalia e le Minisita o Lautimuia Afoa Uelese Vaai i lana faatalanoaga ma le fale televise a le TV1 na ia ta’ua ai, o nisi ia o itu na afua ai ona pasia e le Kapeneta le toe iloilo o le polokalame ma faamautu ni faiga faavae e limataitaia ai le polokalame.

Faaalia e le Minisita o le itu e ao ona malamalama ai le atunuu, e lē na o Samoa o loo aafia ona tagata i ia faafitauli, o loo aafia ai foi le tele o atunuu o le Pasefika o loo iai o latou tagata i le polokalame.

Sa faamanino foi e Lautimuia, o le isi lea itu ua manatu ai le Malo e tuu i tua i pulega a alii ma faipule ma a latou Fono Faavae e filifiliina tagata e malaga i le polokalame.

Ma o la latou matafaioi o le talanoa ma apoapoai i o latou tagata ina ia mautinoa e lētauvalea afioaga, ma o le a tuu foi i alii ma faipule e faia faasalaga mo i latou e aafia i ia faafitauli.

O le faamoemoe ia oo atu i le faaiuga o lenei tausaga faaletupe ua mautu vaega uma o le polokalame.

Ae i le faigamalo na se’i mavae atu nei, o le faiga sa fai ai o le faasala e lē gata i le tagata na aafia ae faapea foi ma afioaga o loo nonofo ai, o le lē toe maua o ni avanoa e malaga ai mo galuega faavaitaimi.