O le aufaigaluega a Malo Aufaatasi i Samoa e ana le fautuaga e faaleaoga ai pe aveesea le vaega o le tulafono o soligatulafono o loo faasā ai ulugalii tutusa poo faiga faasotoma.

O le isi lea vaega na aliali a’e i le ripoti a le Hai Komesina o Malo Aufaatasi mo aiā tatau na faaulu ai i le fono i le vaiaso talu ai i luma o le UN rights council a malo aufaatasi.

O le ripoti lava lea ma ona faamaumauga na maitauina ai le manaoga o Mālō Aufaatasi i faatalanoaga o lea mataupu.

Taua i ripoti ua maitauina ai e Samoa e ono fautuaga faasaga i le faasinomia ma le puipuia o sauaga tau feusiaiga, ituaiga tagata e aofia ai ma le manaoga e faaleaogaina le vaega o le tulafono o soligatulafono 2013 le faasotoma ma o lona faasalaga o le falepuipui e oo atu i le 7 masina.

I ripoti a le Niusipepa a le Samoa Observer na faaali ai le fingalo o le taitaifono o le vaega faaupufai a le FAST o le Minisita foi lea o Faatoaga ma Faigafaiva faasaga i se manatu a le Ofisa o le Mālō Aufaatasi ina ia faataga le faapa’ū o pepe (sei tulou) le abortion i Samoa. 

O se manatu na taua e Laauli Leuatea Polataivao Schmidt e matuā le o gatusa ma tulaga faakerisiano a Samoa ae le gata i lea o tu ma aga a le atunuu.

Fautuaina ai foi e Laauli le faalavelave o Simona Marinescu le sui o le UN i mataupu tau polokiki a le Mālō ma o loo sema se taimi e feiloai ai. Taua foi e Laauli e leai se taimi na talanoa ai e le faigamalo o loo iai nei poo le patī a le FAST lea mataupu.