O i latou o loo feagai ma polokalame ma le puleaina e tapu ai le faaaogāina e tagata taaalo o fualaau ma vailaau ua manaomia ai le fausia o sona ofisa tumau i Samoa nei ina ia mautu ai le agai i luma o lana auaunaga.
O le Taitaifono a le Samoa Medical & Anti-Doping Agency (S.M.A.D.A) Natanya Potoi na ia faailoa i se faatalatalanoaga le tulaga o loo faatino ai le auaunaga i le atunuu e ala lea i taaloga.
“O loo iai lava le naunautaiga e faatū ai se ofisa mautu o lenei auaunaga i Samoa nei auā o le taimi nei o matou uma o loo tauaveina lenei galuega o volunteers.
“A o lei amata ona iai a tatou volunteers e pei o le 2003 o le tausaga lea na uluai faia ai tulafono e puipuia ai tagata taaalo mai le faaaogāina o fualaau ma vailaau ae lei agai tele mai i atunuu laiti e aofia ai ma Samoa.
“Sa mātele lava i atunuu tetele o loo lelei le tamaoaiga ma sa malosi ai le tulafono i ia atunuu.
“Ae o le taimi lenei i tulafono a le World Anti-Doping 2021 o atunuu uma o loo lima taitaiina e nei tulafono e ao lava ona mautu se faalapotopotoga ma se ofisa.
“O le uiga o lea faamatalaga ia iai tagata faigaluega tumau poo full time workers ina ia mautinoa ai o loo comply i tulafono ma ia malamalama lelei ai tagata taaalo ma le silafia o nei vaega uma.
“Ae o le agaga faafetai o i latou o loo ofoina mai le auaunaga e aunoa ma se totogi e ese ma le galulue malosi o le mau foi lea e iloa ai its all about passion and commitment.”
O se tasi o tulaga maualuga ua ausia e Samoa o le avea ai lea ma sui o le Anti-Doping Foundation Board o se vaega maualuga ile lalolagi oloo aofia ai atunuu e 42 o i latou ia e faia filifiliga o mataupu mo le faaleleia o vaega nei.
“E pau lea o le atunuu o le Pasefika o loo saofai mai i luga o nei tofiga tetele i le lalolagi ma o le sui foi lea o le Pasefika e faaleoina mataupu i luga o le vaega lenei.
“E faafetaia ai foi le Malo i le fesoasoani mai i galuega faatino a le S.M.A.D.A. e tauala mai i le Matagaluega o Aoga Taaloga ma Aganuu o loo faia pea a matou fonotaga auā le agai i luma o le faatinoina o le auaunaga.”
