O le lē lava poo le sioki o oloa e faaaogā e le mamalu o le atunuu o se itu na tele finagalo na lagalagā ai.
O le masina na tea nei na leai ai ni suka, o moa ma isi oloa e manaomia mo aso uma.
Ae i le faatalanoaga a le Sooupu a le malo ma le Minisita o Tupe o Lautimuia Uelese Vaai na faamalamalama auiliili mai ai e lana afioga le tulaga o le malo i itu tau oloa.
Saunoa Lautimuia e lē o se matafaioi a le malo le auina mai o oloa mai fafo, auā e leai ni faleoloa a le malo, ae o le matafaioi e patino tonu i pisinisi tuma’oti.
Faaalia e Lautimuia o le isi tulaga e ono aafia ai le malaga mai o vaa lauoloa, ona o aafiaga o vaa, o le siitia o le tau o le suauu faapea ai ma le popolega o kamupani vaa i le osofaia o latou ma aafia ai tagata faigaluega i luga o le vasa.
Aemaise lava i le vaega o loo tu ai Samoa e fai si mamao, ma e leiloa ni faafitauli e ono tulai mai a o malaga mai le vaa.
Peitai na faaalia manino e le Minisita, mo le agai i luma, o le isi itu lea e ao ona tagatagai ai le malo.
Mo le agai i luma e ao ona silasila i auala e mafai ai ona galulue faatasi le malo ma pisinisi, ma e lē tatau i le malo ona tuuaunoaina le faafitauli o le utiuti o oloa.
Ta’ua e Lautimuia e mo le agai i luma ina ia mautinoa e aua ne’i toe tulai mai lea faafitauli, o le matafaioi a le malo o le fesoasoani i le atunuu ina ia aua ne’i aafia, ae ia mautinoa e sologa lelei mai lava oloa o loo auina mai fafo.
