Ua fautuaina nei e le faamasinoga maualuga le tatau ona tapena ma saunia ni fesoasoani faapitoa mo fanau laiti o loo aafia i sauaga mataga.

O lea talosaga e mo fanau teine laiti e i lalo o le 13 ma le 12 tausaga le matutua lea e lē gata na aafia i sauaga mataga, maua i le ma’itaga ona o nei faiga faamalosi ma tauau ai ina aafia o latou ola. O le fautuaga lea mai le tamaitai faamasino Tafaoimalo Leilani Tuala Warren na fai a’o tuuina mai ai le faaiuga i se mataupu faasaga i se tamā 56 tausaga le matua lea na ia faia se faiga aiga faamalosi ma se teineititi 13 tausaga le matua i le 4 tausaga talu ai. 

O lea faalavelave na tulai mai totonu o se malumalu na faa faamalosi ai e Fepuleai Maualuga Mika se teineititi laititi.( O le

faatonuga mai le faamasinoga e mafai ona faailoa le igoa o lē na faia le solitulafono ae le’o le teineititi ma aafia).

Taua e Tafaoimalo o le mataupu lona lua lenei e aofia ai fanau teine laiti e i lalo o le 12 ma le 13 tausaga le matutua ua ia faia ai se faaiuga ma ua tatau ona tagatagai i se vaega fesoasoani ai i nei fanau teine ma le tele o vaega na aafia ai e lē gata faaletino ae faapea le mafaufau.

I le faaiuga a le tamaitai faamasino i le vaiaso nei ua faamaonia ai moliaga o lea na alii ma ua faasala nei i le 11 ma le afa tausaga e falepuipui ai i le toese i Tanumalala