Afai ae tu mai le National i le palota tele a le atunuu ia Oketopa, o le a ia faasāina telefoni a fanau aoga i taimi a o iai i aoga.
O le saunoaga lea a le taitai o le National, Christopher Luxon ananafi, ma le tala o se faiga se’i tau fesoasoani ai i le pa’ū o taumafaiga a fanau aoga o loo iai nei.
O le aso atoa lea ua fai mai Luxon e faasā ai telefoni a fanau a o iai i aoga, ma e aofia ai ma taimi e malolo ai i le va o mataupu, ma e aofia ai aoga tulagalua faapea kolisi maualuluga.
Peitai o se faiga o le a tuu atu lava i le aoga le faitalia pe faafefea ona faataunuu ma e iai lava foi le faatagana faapitoa mo fanau e moomia pea le telefoni ona o mafuaaga tau le soifua maloloina.
Afai ae taunuu lenei suiga, o le a o tutusa ai loa Niu Sila ma setete o Ausetalia lea ua faamalosia tulafono nei i taimi o aoga a fanau.
