Ua iai se finagalo o le afioga i le faamasino mai Niu Sila o Rhys Harrison e tuuina atu ni folasaga faaletulafono poo submissions a loia o loo aofia i le suesueina o le talosaga a le faipule o Falealili 1, e faia ai se iloiloga ma se faaiuga pe fa’aauau ona su’esu’e i le talosaga autū a le faipule le afioga, Toelupe Maoiautele Poumulinuku Onesemo, le tasi o mau poo ground o lana talosaga o loo atagia ai se tuua’iga i le faaitu’au o le afioga i le Faamasino Sili i le tauaveina o su’esu’ega o le tagi tau palota a lea itumalo faapalota.
Fa’aalia e le afioga i le faamasino o, Justice Harrison e mātuiā ma ogaoga tele le tuua’iga ma e alagatatatau ai ona su’esu’eina muamua a o le’i tagofia i se tulaga aoao tetele poo le substantial hearing le talosaga autū lea ua faatulaga e faagasolo i le masina o Iuni.
I le faailoa ai e le faamasino o le ‘auivi o tapenaga a loia o taualumaga amata e tagofia muamua ai nisi o vaega o le a fa’aaoga ai fesootaiga faatekonolosi i luga o upega tafailagi.
O le a lē auai le Loia sili a le malo ma lona ofisa i su’esu’ega o le talosaga a le faipule o Falealili 1 ona ua silasila le faamasinoga e iai aafiaga o le Loia Sili ona sa avea o se tasi o loia na finauina moliaga sa tuua’ia ai le faipule i le tagi tau palota ua mae’a ona su’esu’e ma faia iai le faaiuga.
O le a avea ai se loia mai fafo ma le tama’ita’i loia sa avea ma Loia Sili le afioga, Su’a Hellene Wallwork Lamb ma uo a le faamasinoga la te molimauina taualumaga uma ma tuuina atu ni tuualalo ma fautuaga faaletulafono.
