Mai le faitauga faaiu o palota faapitoa lea sa faatalitali iai se faaiuga mautu o le faigapalota lautele e Niu Sila i lenei tausaga, o lea ua mautinoa mai vaega nei:
- O le a moomia e le National le lagolagosua a le ACT ma le NZ First ina ia faamautu ai le Faigamalo o le a sosoo mai e taitaia Niu Sila.
- E lei mafai e Christopher Luxon ona faamautu mai se taimi tonu o le a faamae’a ai le faatalanoaina o se faigamalo soofaatasi, ae na ia ta’ua o le a lē toe faatali i se isi toe faitauga o palota a nisi o itumalo faapalota e ono faia ai lena toe faitauga (recount).
- E lua isi nofoa a le National lea ua toe mamulu ese atu ina ua uma le faitauga o palota faapitoa; o le nofoa o le itumalo Nelesoni ma le nofoa o le itumalo o Te Atatū, lea ua toe maua e le vaega faaupufai a le Labour nofoa na e lua.
- O le a tulai mai e toa 123 Faipule o le a iai o le Palemene ina ua manuia mai isi nofoa faaopoopo a le Te Pāti Māori ma le iuga o le a iai le faigāpalota laititi a Port Waikato ona tautau ai lea o nofoa e lua. E 6 nofoa ua manumalo ai le Te Pāti Māori.
- O le faitauga faaiu o le palota na faaopoopo ai le 603,257 palota faapitoa i le iuga na iai i le po o le faigāpalota autu. Sa iai le 20.9% o le aofai o palota, ae ina ua fai le faitauga faaiu na tulai mai loa i le 78.2%.
