Ua faamaonia mai e le alii Komesina o Leoleo, Auapaau Logoitino Filipo le maliu ai o se alii 35 tausaga le matua mai le afioaga o Samata-tai i se faigafaiva ma o loo masalomia na malemo.
O lē ua maliu sa o ma lona uso laitiiti e fai lo la faiva i le po o le Aso Toonai ae tulai mai ai le faalavelave, na ta’ua e le Komesina o lipoti e faapea na ta e le galu lea alii ma pa’ū ai loa i le sami.
Na ta’ua o le taimi na pa’ū ai lea alii na agai atu ai loa lona uso laitiiti e ta’u i tagata le mea ua tupu.
Na alu le sailiga a leoleo ma le nuu i le taeao o le Aso Sa ma maua ai loa lona tino maliu, ma o loo taoto nei i le falemaliu i Tuasivi Savaii.
Ua faailoa mai foi e le alii Komesina o le taimi lenei e lē o saogalemu lava le agai atu mo faigafaiva ona o le siisii o le tai ma le galu lea o loo tuuina mai ai lapataiga a le ofisa o le vaaitau, ma e ao lava ona utagia e lo tatou atunuu.
