O le asō ua fuafua e amata ai le taamilosaga lona 35 a le Digicel Marist 7s i Samoa ma mo le uluai taimi o le a auai ai ma le ‘au a le Western Sydney Two Blues o loo faafoe e nisi o tamafanau a Samoa e alala i Sini.
O le Two Blues 7s Academy e i lalo o le faamalumaluga a le Western Sydney Academy ua faatuina faapitoa ina ia maua ai se avanoa e faalautele ma faailoa ai taleni a nisi o tama taaalo Pasefika e aofia ai ma Samoa.
O le alii faiaoga ma o le trainer foi o le ‘au, o se alo lava o Samoa, Kruger Roache o loo taitaia le aumalaga ma e aofia ai tama taaalo e toaono e iai tupuaga Samoa, toatasi mai Tonga, toalua mai Fiti, 1 le alii taalo Maoli, tasi mai Singapore, Bali ma le toatasi e iai tupuaga Argentina ma Uruguay.
Ua faailoa e i latou o loo fesoasoani i le malaga atu o le ‘au i Samoa o se avanoa tāua foi e faalautele ai le silafia o alii taaalo i le taaloga aemaise o se avanoa o le a silasila ai foi ma faatino tu ma aga a Samoa aemaise mo nisi faatoa malaga mo le uluai taimi i le atunuu.
O le taamilosaga e faamae’a i le Aso Toonai o le vaiaso nei lava ma ua fuafua le ‘au e toe taliu mai i Ausetalia i le Aso Sa o lumanai nei.
O le alii o Dietrich Roache e pei ona silafia e le toatele i le ‘au taitoafitu a Ausetalia, o se alo o le alii faiaoga, e le o mafai ona auai i le malaga atu a lana ‘au i le faamoemoe i Samoa ona o loo tapena le fitu a Ausetalia e faimalaga i le taamilosaga taitoafitu i Niu Ioka i le masina fou o Iulai.
