Ua amatalia nei le nofoaiga a le tamaitai 24 tausaga o le soifua, o Nicolina June Ah Kuoi, i le tauaveina o le pale o le tausala o le Miss Global Samoa ina ua mae’a ona faapaleina i se sauniga na faia i le vaiaso nei i le faletalimalo o le Taumeasina.
O se tasi o fuafuaga mo ana tapenaga i le sailia o se tausala o le kelope le Miss Global, o le malaga atu lea i le atunuu o Filipaina e faia ai ni a’oa’oga ma tapenapena ai i le tauvaga tele o le a tauva ai tamaitai mai atunuu e 70 o le lalolagi.
O le Sui Palemia le afioga Tuala Tevaga Iosefo Ponifasio o le sui o le Malo na saunoa i le faapaleina o Nicola a o molimauina e le pulega ma sui o le kamupani o le Vodafone Samoa o loo lagolagoina le tausala mai lo tatou atunuu, faapea aiga ma uo.
Na saunoa le Sui Palemia ma ia faailoa o le mau tauave a le Malo o le lagolagoina o tamaitai mai le aveesea o faiga faailogatagata faasaga ia i latou, aemaise o le tapu’eina o lo latou tulaga e avea ai ma ta’ita’i, o le malo ma le atunuu.
O le tausaga na te’a nei na faamauina ai se tasi o matati’a na faatuina e Samoa mai lea tauvaga, o le maua e le tatou sui tauva le tamaitai o Haylani Pearl Kuruppu o le tulaga lua le first runner up.
