E to’afā ni tagata sa faigaluega i le kamupani o le Tradepac ua lē mafai e loia a leoleo ona finauina o latou moliaga e fesoota’i i le toesea o se tinoitupe e $241,000 tālā a lea kamupani, ona ua lē mafai ona malaga mai Niu Sila le molimau autū a leoleo.
O le molimau autū o se alii Initia Fiti sa avea ma pule o le Tradepac i Samoa i le tausaga e 2020 lea na tupu ai le faaletonu ma tuua’ia ai i latou sa molia e leoleo.
O moliaga o ia tagata e to’afā sa faatulaga e valaau molimau ia Tesema o le tausaga na te’a nei, peitai sa talosaga loia a leoleo mo se isi avanoa e tolo ai ona o le molimau autū o loo feagai ma ana su’ega.
Na tolopo mai ai le mataupu i le tausaga nei, ae peitai ua toe faailoa e loia a leoleo, ua iai aafiaga tau gasegase o le molimau autū ma ua lē mafai ai ona malaga i se isi atunuu mo le umi e 12 masina.
Talu ai o le tologa mulimuli lea o le valaauina o mau a leoleo ae ua lē mafai lava ona malaga mai i Samoa le molimau autū, ua talia ai loa ma le talosaga a leoleo e faasolomuli i tua moliaga uma ma ua faalēaogāina ai e le faamasinoga.
O lona uiga ua laki le to’afā sa molia i tuua’iga o solitulafono e fesoota’i i le toesea o le 241 afe a le kamupani o le Tradepac.
