O le taeao analeila ua faimalaga atu ai le Palemia o Niu Sila Chris Hipkins mo lana uluai malaga i atunuu i fafo talu ona avea ma Palemia ma ua fuafua o le a feiloai atu ai i le Palemia o Ausetalia o Anthony Albanese pe a taunuu i Canberra.
O Ueligitone o loo lipotia na malaga ane ai le Palemia i le vaalele o le Royal NZ Air Force agai i Canberra faatasi ma lana aumalaga ma le au faasalalau ma ua taua e toe foi mai i le afiafi ananei.
Fai mai le Newshub o le a faailoga ai ma le 40 tausaga talu ona amata le maliega i tulaga tau tamaoaiga i le va o atunuu e lua male 80 tausaga talu ona faatuina hai komesina.
O loo fuafua o lea feiloaiga o le a faatalanoa ai le tulaga tau tupe ma nisi o mataupu o loo galulue faatasi ai atunuu e lua i le Indo Pacific. O le sootaga lea trans tasman o se tasi o sootaga taua ma vavalalata mo Niu Sila ma ua faailoa e le Palemia o Hipkins o le tāua foi lea ia te ia ina ia avea Ausetalia o lana uluai malaga lea talu ona avea ma Palemia.
Fai mai Hipkins o le malosi o le sootaga, o le vavalalata foi lea o tagata o atunuu e lua ma le atili lelei ai foi lea ma tamaoaiga Niu Sila ma Ausetalia.
