Tele mafatiaga o nai aiga i Melepone ona o le faalavelave na susunuina ai e se tasi se aoga a nai tamaiti e iai aafiaga faapitoa, special needs children.

E oo mai i le aso o loo sue e leoleo le tagata na faatinoina lea tulaga ae fai mai leoleo na vaaia se alii o sola ese mai mai le Heatherwood school, le aoga lea i le itu i sasae o le city.

Fai mai ae lei mu le aoga sa feagai faiaoga ma le aoga atoa ma galuega toe faaleleia ae sa iai foi se faaletonu ia i latou sa feagai ma le galuega.

Molimau nisi o se tulaga faanoanoa tele lenei ona ua faaleagaina uma le tele o potu aoga o nai  fanau ma a latou galuega sa faatino i potu aoga e pei o ata ma poloketi sa galulue ai.

O loo faagasolo fonotaga a le pulega o le aoga poo le a tonu leisi laasaga o le a sosoo ai ae faapea foi i le matagaluega o aoga.