Ua mafai nei ona faailoa igoa o alii e toalua e atoa iai le toatolu o i latou ua molia i le faalavelave na maliu ai si alii o Janak Patel lea sa faigaluega i le dairy i Sandringham.
O le taeao ananafi na tutulai ai le toatolu uma lea i le faamasinoga maualuga i Aukilani ma o loo tetee uma i o latou moliaga.
E ui la o loo taofia pea le faailoaina o le igoa o le alii o loo molia i le fasioti tagata ae o le isi toalua lea o loo feagai ma moliaga o le gaoi e aofia ai Henry Fred 36 tausaga ma Shane Tane 42 tausaga.
O lē ua maliu o Patel sa osofaia lava i fafo ane o le Rose Cottage Supperette i Sandringham i le masina talu ai.
Ua toe taofia uma le toatolu lea i le vaaiga a leoleo ae ua ta’ua o le faamasinoga o le mataupu lea faatoa faataunuu i le 2024.
