Ua tuuina aloaia nei i le Matagaluega o Aoga ma Aganuuu ni tusi taiala ua mae’a tuufaatasia e le Matagaluega o le Siosiomaga e faaaogāina lea mo le aoaoina o le fanau aoga.
Faailoa e le Pule Sili o le Matagaluega o Aoga, Afioga Aeau Chris Hazelman le tāua o vaega nei mo le galuega o loo feagai ai ma le Matagaluega.
“O le naunautaiga lava e lē na o faamaumauga, o lipoti, a ia faapena ona iai taiala e ola ma tupu e aoaoina ai alo ma fanau lalovaoa o le atunuu i vaega eseese.
“E lima taiala poo modules o vaega e aoaoina ai fanau i mea tau siosiomaga e pei ona iai vaega e lima e aofia ai taiala mo le puleaina o otaota ma lapisi, o faatinoga mo le faasaoina lea o amu i le gataifale, o le tāua o le fagotaina ma le tatau o le gataifale ma ogasami, o le totoina lea o laau mo le vaomatua ma le faamanatuina lea o le folauga poo le aganuu a le atunuu mai aso anamua o le folau.”
Na momoli ai le faafetai a le Pule Sili e tusa ai o lenei fesoasoani ua tuuina mo le Matagaluega auā le faaaogāina mo aoaoga a le fanau.
“O nei tusi taiala ua mae’a saunia e mautinoa ai le tāua o le aoaoina lelei ma le malamalama o fanau aoga i vaega nei tau i le siosiomaga.
“E iai le talitonuga o le a tele sona aogā i alo ma fanau a le atunuu i lenei foi vaega e pei ona galulue ai lo tatou Malo ma le atunuu atoa ina ia puipuia o tatou laufanua aemaise o le siosiomaga mai suiga o le tau ma ia mautinoa lelei ai a tatou matafaioi ma le tulaga e ao ina faatino mo le puipuia lelei o nei vaega.”
