A’o toe ai o nai itula ona faataunuu loa lea o palota laiti a le atunuu i le aso a taeao o lea ua maea palota muamua poo pre polling.
Ua faatulaga mai e to’a 580 tagata na mafai ona faatino o latou filifiliga mai le palota muamua i le aofaiga e 1011 o tagata palota na lesitala mo le faia o latou palota muamua ao lumanai ai palota laiti o itumalo e 6 i le faaiuga o le vaiaso.
E manino mai le aofaiga o i latou ua maea faia filifiliga i le palota muamua e 431 e le’i agai e faatino o latou palota ma ua faaalia e le Komesina o Faigapalota le afioga ia Faimalomatumua Mathew Lemisio e mafai lava i le Aso Faraile e faia ai palota laiti ona agai i latou ia e faatino o latou palota i le faaaoga lea o fale palota faapitoa.
I le 580 o palota ua maea ona faia o faamaumauga a le Ofisa o Faigapalota ua faailoa ai o le Itumalo Sagaga No.2 e 143 palota na faia ai o le itumalo palota o Sagaga No.4 e 92, itumalo palota o Aana Alofi No.2 e 58, Safata No.2 e 116, Falealili No.2 e 53 ma Aleipata Itupa i Lalo e 118.
O le palota muamua poo le pre polling e mo tagata e faigaluega i le Aso o le palota tele faapea palota laiti, o tagata matutua e faigata ona faatali umi i le toatele o i latou e agai e faia palota i le aso oni faigapalota tetele ma palota laiti faapea foi i latou e gasegase ma aafia i ni manaoga tumau o le tino. E agavaa ai foi ma tagata e malaga ese ma Samoa i le vaiaso tonu e faia ai se faiga filifiliga e saili ai sui usu fono o le Palemene.
O le Aso Gafua a sau nei i le faitauga aloaia e faatoa iloa ai sui tauva ma palota na o latou maua i le palota muamua poo le pre polling. E lata i le 16000 tagata palota o le a auai i palota laiti i le faaiuga o le vaiaso.
