Ua mae’a le taimi galue i Samoa o le uluai sui o le Malo o Peretania ua faamautu i le ofisa o le Haikomesina o lea Malo i lo tatou atunuu, le susuga David Ward.
O ia le sui muamua o le malo Peretania ua faamautu i lo tatou atunuu ina ua tatala aloaia le ofisa o lea Malo i Samoa i le tausaga e 2019.
O tausaga ua tuanai o sui o lea Malo sa faamautu i Niu Sila sa tauaveina foi mataupu i le va o Malo o Peretania ma Samoa.
O le faailogaina e le ofisa o lea Malo tele o le sauniga na faau’u ma faapale ai le Tupu o Salesa III ma lana masiofo o Camilla, na faailoa ai e David Ward lana faafetai i le Malo o Samoa i le taimi a o galue i lo tatou atunuu i le lagolago ma le fesoasoani i soo se auaunaga sa manaomia e lona ofisa.
O le sauniga foi lea na ave ai le faafetai a le taitai o le Malo le afioga i le tamaitai Palemia i le alii Haikomesina i lona sao tāua i le lagolagoina o manaoga o le Malo o Samoa, aemaise o tapenaga mo le taligamalo i le tausaga fou i le fono a taitai o Malo o le Taupulega, o le a afio mai ai i lo tatou atunuu le Tupu o Salesa III, mo le taimi muamua e faatino ona tiute o le Faaao o Malo o le Taupulega.
