Aso Faraile 09 Oketopa 2026.

Ua mae’a fa’asilasila e le Komesina o Faiga Palota le taunu’uga aloa’ia o pālota lāiti a Itumalo faapalota o Vaimauga 3 ma Falealili 1 ma ua faamaonia foi e le afioga i le Ao o le Malo lea taunu’uga o lea faiga filifiliga.

Ua mae’a foi ma le piliota e sefulu aso faigaluega na amata faitau mai le aso na fa’ailoa lautele ai le faai’uga aloa’ia o ia faiga filifiliga, ma ua fa’ailoa ai e le Ofisa Sili o le Pulega o Faamasinoga ma le Faafoeina o mataupu tau faamasinoga ua leai ni tagi o moliaga o faatōsina solitulafono na fa’aulu atu.

O loo aiaia le sefulu aso faigaluega e mafai ai ona fa’aulu ni moliaga i le vaega 109 o le tulafono o faigapalota o le tausaga e 2019.

Talu mai le palota tele fa’afuase’i a le atunuu i le aso 29 o Aukuso o le tausaga na te’a nei e valu tagi tau palota na fa’aulu atu i le faamasinoga faaopoopo iai ma tagi e lua mai le Vaimauga 3 ma Safata 2, ina ua mae’a palota lāiti a ia itumalo e mafua ina ua faamavae mai le vaega faaupufai e puipuia aiā tatau a tagata sui faipule o ia itumalo palota ina ua fia lagolago atu i le pati faaupufai o le Faatuatua ile Atua Samoa ua Tasi.

O loo totoe nei le mataupu o le tagi tau palota a Safata 2 ua mae’a ona su’esu’eina ma o loo tālia se faai’uga.