Ua mae’a nei ona faapipii mea pu’eata CCTV i le taulaga o Apia o le a iloa uma ai gaioiga a taavale ma tagata feoa’i ma o se tasi lea o fesoasoani i le galuega a leoleo pe a oo ina tula’i mai ni gaioiga solitulafono.
Ua faailoa e le Komesina o le matagaluega o leoleo, falepuipui ma le toe fuata’ina i auala o faasalalauga a le malo, o mea pu’eata uma ua faatutū i nofoaga eseese o le taulaga, o le nofoaga autū o loo iloa uma ai ata mai ia mea pu’eata o le ofisa tutotonu o leoleo i Apia.
O le taimi nei o loo faasolo le galuega o le faapipiina o ia lava masini pu’eata mai le taulaga aga’i atu i Vaitele.
O le a fesoasoani tele ia masini i le mata’itūina o le puipuiga i le taimi o le Fono a Malo o le Taupulega i le masina fou.
O inisinia ma tagata e iai tomai faapitoa i le faapipiina o mea pu’eata CCTV mai le matagaluega o leoleo a le malo o Ausetalia sa fesoasoani i le galuega o le faapipiina o ia masini.
