O le ogatotonu o le vaiaso muamua lenei o le tausaga fou, ua toe foi ai auaunaga masani a pisinisi tumaoti i tautua faaauau sa iai ina ua mae’a aso malolo o le Kerisimasi ma le Tausaga Fou, ae o le Malo e faatoa toe tatala ofisa mo galuega masani i le Aso Gafua o le vaiaso fou le aso 9 o Ianuari.

O aso fiafia o le Kerisimasi ma le Tausaga Fou na amata ai aso malolo faaletulafono i le Aso Sa e oo i le Aso Lua ma o tagata sa faigaluega ai e tatau ia i latou e ana galuega ona totogi iai le faamanuiaga ua aiaia faaletulafono mo i latou e galulue i aso malolo.

O auaunaga faaauau a le Malo e pei o le matagaluega o leoleo, falepuipui ma le ola toe fuataina, le matagaluega o le soifua maloloina, le tineimu ma galuega laveai i taimi o faalavelave faafuasei, sa faaauau pea le latou tautua ona o auaunaga e manaomia i soo se taimi i aso uma.

E lei maua mai se lipoti o le aotelega o aso malolo ma ni faalavelave na tutupu ai.

O le Kerisimasi o le 2022 ma le Tausaga Fou 2023 sa molimauina le tele o fiafia a aiga ma nuu sa faia ai, o le mafuaaga lea o le tuu itiitia o le tulaga maua o nisi o oloa tau avamalosi, aemaise o loo tumau pea le tapu o le toe gaosia ma le faatauina o avamalosi o le vodka, faapea meainu sui poo premix drinks lea o loo aofia i le lisi o ituaiga o avamalosi o loo faasā ona toe gaosia ma faatau atu i le atunuu lautele.

Ua na o le avamalosi o le Taula ma le Vailima, o fagu uaina ma fagu malosi mai fafo o loo faataga ona faatau i le taimi nei.