Ua faato’ā tauaao e le tamaitai loia ua totogi e le malo le faila o moliaga o Malele Atofu Paulo, ma ua tapena ai se folasaga ma se finauga faaiu a o lei tuuina mai se faasalaga mo Malele faapea Lema’i Faioso Sione, ua faamaonia o la moliaga o le fafau o se gaioiga e tagatavale ai lē sa avea ma Palemia o le atunuu.
O le Aso Faraile na tea nei na toe valaau ai le mataupu lenei, ma faailoa ai e le loia ua tulai nei mo Malele, ua sauni e tuuina atu lana folasaga i le faaiuga o le vaiaso nei le Aso Faraile lea, a o lumanai ai le lauina o se faasalaga i le aso 14 o le masina nei o Iulai.
O le talosaga a Lema’i ma lana loia e taatia le lauina o le faasalaga se’i mae’a ona suesue le talosaga ua toe apili ai e Lema’i le faamaonia o lona moliaga, ua lē talia, ma ua faaauau ai ona faatali le lauina o se faasalaga ona faatoa suesue ai lea o lana talosaga apili.
Ua faaumiumi ona tolo lenei faamasinoga ona o le suia o le mafaufau o Malele ma ia teena le toe tauave o lana itu e le alii loia o Quentin Sauaga, ma toe faatulaga ai le valaauina o le faamasinoga se’i saili sana loia lea ua taunuu i le talia o lana talosaga mo se loia e totogi e le malo.
O Lema’i sa talia le suesueina o lana talosaga mo le taatia o sona faasalaga ae fai muamua lana apili, peitai ua teena lea talosaga ma ua faatali se’i lau muamua lona faasalaga.
