Ua lipotia o se alii mai Niu Sila lea na loka e leoleo lima ma aveese mai se vaalele a le Ea Niu Sila i Melepone.
O le asō ua faailoa ai e leoleo a Ausetalia le AFP ata o le taimi na aveese mai ai le tagata lea i le taeao ananafi, fai mai sa faasuā’avā ma pisa i luga o le vaalele i se malaga a le ea Niu Sila mai Perth e aga’i mai i Aukilani.
O loo feta’ua’ina e le aufaigaluega a le vaalele i le lipoti a le televise tasi e faapea, o lea alii e 23 tausaga sa lē usita’ia tulafono i luga o le vaalele ma feta’ua’ina foi lona faaoolima i se tasi o le aufaigaluega.
Na toe faaui ai le vaalele i le malaevaalele i Melepone ma aga’i atu loa iai leoleo a Ausetalia ma aveese mai ma le vaalele.
Ua molia i le faaoolima i se tasi o le aufaigaluega a le vaalele ua aafia ai le faatinoina o ona tiute, fai mai le ta’ita’i leoleo mai Ausetalia o soo se ituaiga sauāga poo ni uiga lē talafeagai e faatino i ni nofoaga faapea aemaise i luga o le ea, o le a avea o se mafatiaga tele e lē gata i pasese ae faapea foi le aufaigaluega.
E lē gata i lea o le tuuina ai o se faamata’u i le soifua o i latou o loo faimalaga.
Puna o Faamatalaga: https://www.1news.co.nz/new-zealand/
