O le afea o Samoa i le amataga o lenei vaiaso e le toalua o le tamaitai Sui Peresitene o le Malo o Amerika, ua faailoa ai e Douglas Emhoff se fesoasoani a lea Malo tele i le tapenaina o ni nofoaga sulufai mo taimi o sunami poo galulolo, ma faatutū ai foi nofoaga mo masini faailoilo e logo ai tagata i se sunami.

Ua faaopoopo lea foai i isi fesoasoani mo Samoa ma isi atunuu o le Pasefika e tusa le tau aofai ma le 2 tesimale 6 miliona tala Amerika, o le a fesoasoani ai le Iunaite setete i polokalame o suiga o le tau, ma le saga tapueina o galuega o le atina’e o le tamaoaiga o atunuu taitasi.

O le asia e lea sui o le Malo o Amerika o le faalapotopotoga o tina faipisinisi o Samoa sa ia faafetaia ai le taitaiga o lea faalapotopotoga tuma’oti i lona sao i le siitia o taumafaiga o le atina’e o tina ma tamaitai o se isi lea o manulauti o faiga faavae a le Malo o Amerika o loo soosootau’au ai ma le Malo o Samoa.

O le saunoaga a lea sui o le Malo o Amerika i le feiloaiga ma tina faipisinisi o le tatou atunuu na ia faafetaia ai le lagolago malosi a taitai o lona Malo i soo se taumafaiga o atina’e, ma polokalame e faasagatau ai i lu’itau o suiga o le tau, o se mataupu o loo laualuga i fuafuaga a le Peresitene ma le Sui Peresitene o lona Malo.