O le tausaga e 2009, 2014, 2017, 2020 ma le 2021 sa molimauina le afea ai o le pulega o le tineimu ma galuega lavea’i i taimi o faalavelave faafuase’i i fesoasoani a le malo o Iapani ma e fulisia le agalelei i le aumaia o taavale fuimu e faatino ai lena galuega fesoasoani a lea pulega tuma’oti o le malo.
Peita’i o lea foi ua molimauina i le masina 11 o lenei tausaga 2025 e lē o solomuli le polokalame fesoasoani a Iapani i le toe faamautū o le isi ana foa’i mo lea auaunaga tāua.
Ua mae’a ona sainia se feagaiga a le sui o le malo o Iapani i Samoa ma le Komesina o le tineimu ma galuega lavea’i i taimi o faalavelave faafuase’i e faatau ai ni taavale fou se tolu.
O ia taavale o le a mafai ona feavea’i ai le aufaigaluega i taimi e faatino ai galuega lavea’i pe a tutupu ni faalavelave e pei o mu, ona ua faailoa e le ofisa o lea malo i lo tatou atunuu o loo iai taavale a le pulega ae e na o le to’alua pe to’atolu tagata faigaluega e mafai ona malaga ai.
O taavale e tolu o le a faatau o le a tuuina atu i nofoaga o iai lea auaunaga tāua i le ofisa autū i Apia, o Aana ma Maota i Savaii.
E lua veni ma le pikiapu o le a faatau i le fesoasoani a lea malo e faaalu ai se vaegatupe e tusa ma le $356,521 tālā Samoa.
