E ui e lei maua le atoaga o se ripoti mai le Matagaluega o Leoleo, Falepuipui ma le Toe Fuataina o ni faalavelave ma ni solitulafono na tutupu i taimi o aso fiafia o le kerisimasi o lena tausaga ua alu ma le tausaga fou ua aulia mai, ae ua faailoa e le Sui Komesina o le Matagaluega o le aotelega lava ia o mataupu sa logoina ai le tiute a leoleo e leai se soifua na fano ma maumau ini faalavelave na tutupu a o feagai le atunuu ma aso fiafia o le kerisimasi ma le tausaga fou.
Ua na o ni faalavelave tau taavale ae leai ni soifua na aafia ai se’i vagana taavale ua faaleagaina ai. E tasi se soifua na fano a o lumanai le kerisimasi ae o loo masalomia o se faalavelave na faamuta ai e lē ua maliu lona ola.
I le taimi lava o aso fiafia ua faaalia e le Sui Komesina, susuga Leiataua Samuelu Afamasaga e le’i mālōlō le galuega a leoleo o le sailia o nofoaga sa masalomia o loo faatino ai solitulafono tau fualaau faasaina. E to’alima ni tagata na taofia ai e aofia ai alii e to’afa ma se tama’ita’i e toatasi.
O loo taofia uma mo su’esu’ega ma faatali le masina fou e tutulai ai i le faamasinoga. Ua faaopoopo atu le toalima lea i le 54 na pu’eina ma taofia i osofa’iga a leoleo ao lumanai le kerisimasi ma le tausaga fou lea sa maua ai fualaau faasāina o le ‘aisa, ma le maruanna, faapea foi na maua ai ma ni la’au malosi, o ututau, paipa e ula ai le ‘aisa ma tupe.
O le to’alima mulimuli o loo taofia na maua i osofa’iga i le vaiaso na te’a nei ma lenei vaiaso sa alu i Tuanaimato, ma Leauvaa.
Fa’aalia e le Sui Komesina o loo taofia foi ma se tagata na su’eina lana taavale ae o se tasi sa molia muamua i lona umia o fualaau faasaina.
