O le faigaluega o fanau aoga e fesoasoani ai i aiga, o se faafitauli o loo faatupulaia pea ma ua tele tausaga e lē o amanaia e le malo.
O le faaiuga o le vaiaso na sau ai lipoti o le toatele o fanau aoga i kolisi maualuluga o lea o loo faigaluega mo le tai 50 itula faigaluega i le vaiaso e fesoasoani ai i mātua e totogi le rent, eletise aemaise o faatauga a aiga.
Ua lipotia e le 1News e iai puleaoga, faiaoga ma aoga ua toe fesoasoani i aiga o fanau nei.
Ae na ta’ua e se tasi o puleaoga o loo galulue nei ma aiga o loo moomia le fesoasoani, ua leva ona faatalosaga i le malo mo se fesoasoani peitai e leai se isi na faalogo.
E ese mai i fanau aoga o loo i kolisi maualuluga, e faapea foi tala mai le tele o iunivesite e pei ona molimau ai le Iunivesite i Aukilani.
