Ua aumai le faai’uga a le faamasinoga o palota i le tagi mulimuli e mafua i tuuaiga o faatōsina o le palota laititi a Safata 2 na faia i le masina o Iulai, ua le mafai e le itu tagi ona fa’amaonia tuua’iga sa autū i le finauga, o se faatōsina solitulafono le fa’aiuga a le malo e tufa le taui 10 miliona mo le itumalo o Safata, ae toe o ni vaiaso faia le palota laititi.

O le lē mafai ona fa’amaonia o moliaga o faiga fa’aālatua le bribery ua tē’ena ma fa’alēaoga ai le tagi tau palota, ma fa’atumau ai le toe filifilia o le afioga Tuiā Pua Fuatogi Letoa e na te tau’ave le tofi faipule i le palemene o le itumalo palota o Safata 2.

O le Aso Faraile ua mavae na aumai ai lea faai’uga ina ua mae’a fofogaina mau sa su’esu’eina i luma o le tama’ita’i faamasino sinia o le Faamasinoga Maualuga le afioga, Leutele Niava Mata Tuatagaloa ma le afioga i le faamasino o lea faamasinoga le afioga, Leiataualesa Darrel Clarke.

I su’esu’ega au’ili’ili a le faamasinoga i mau sa tu’uina atu e le itu tagi ma le itu na molia na taunu’u ai le faamasinoga i lona finagalo e faapea e ui e le fesiligia le lagolago a le malo e aofia ai le palemia ma le kapeneta i le sui tauvā o le vaega faaupufai o le Faatuatua i le Atua Samoa ua Tasi, peita’i o le tapenaina o le tufaina o le taui tupe o se galuega na amata mai i le masina o Me o le tausaga ua mavae na maua ai le taui mai le malo o Niu Sila, ma fa’aauau ai lava seia oo mai ile tausaga nei.

O le fai ma tolo le taimi e maua ai ona o tapenaga a le matagaluega o tupe lea na faatoa mautu ia Iuni o le tausaga nei ma amata tufa ai i le tau faai’ui’uga o lea masina e oo i le masina o Iulai, e manatu le faamasinoga e lei autū i le fuafuaga na mafua ai le palota laititi ina ua avanoa le nofoa o Safata 2 e mafua ina ua faamavae Tuia mai le toe lagolagoina o le vaega faaupufai e puipuia aia tatau a tagata sa lagolago iai ile palota tele, ae suia i le ulufale i le itu faaupufai o loo tumalo.