O aiaiga o le tulafono o fono a nuu o le tausaga e 1990 ma le tulafono o le tausaga e 2017, e lē o aiaia ai se malosiaga faaletulafono e faia ai e matai o se nuu se faasalaga matuia, ae o ni tulafono foi ua aiaia ai le aiātatau faaletulafono o le tagata e faia iai se togisala na te ave ai se faaiuga a matai i le faamasinoga o fanua ma suafa.
Ua faailoa ia vaega e le Ofisa Sili o le matagaluega o faamasinoga ma le faafoeina o mataupou tau faamasinoga, o le Lesitala sinia foi o faamasinoga le susuga Papalii John Taimalelagi Afele, ina ua tapa sona finagalo e tusa ai o le togisala a se nuu i Savaii na faaoolima ai i se tamā o le afioaga, ma saisai vae ma lima ae tui ai le amo ona sa’esa’e lea i totonu o le nuu.
O lea gaioiga sa molimauina i ata video sa tufa solo i faasalalauga i luga o le api o foliga i le faaiuga o le vaiaso na tea nei, ae o lea gaioiga na faatino i le Aso Tofi ua mavae i le nuu o Lefagaoalii i Safune.
Le Ofisa Sili o le matagaluega o faamasinoga ma le faafoeina o mataupu tau faamasinoga o le lesitala sinia foi o faamasinoga susuga Papalii John Taimalelagi Afele.
Ua faailoa e le Komesina o leoleo i se lipoti i le amataga o lenei vaiaso, o loo suesueina e leoleo lea gaioiga sa tulai mai, ma le avanoa e ono molia ai nisi.
O se lipoti lata mai o lenei mataupu ua ta’ua ai, o lea ua molia le toasefululua o nisi o matai ma taulelea sa aofia i le faatinoga o lenei soligatulafono.
