E leai se isi case faaopoopo o le misela, ma ua toe tatala i le asō aoga a Albany Senior High School.
E oo mai i le aoauli ananafi e lei toe iai se isi e faaopoopo i tagata e toalua ua faamaonia le aafia i le misela i Aukilani, ma na sau ai loa ma le faaiuga a le aoga o le a toe foi atu faiaoga ma fanau aoga e aooga i totonu o potuaoga i le asō.
O taiala ma faatonuga a le matagaluega a le soifua maloloina lea foi na fua iai faaiuga a le aoga, ma i se lipoti mai le matagaluega ananafi, e le o iai se tulaga lamatia o fanau mai le pipisi o le misela.
E oo mai i le itula e 3 i le aoauli ananafi e tusa ma le 50 fanau aoga ma se fuainumera itiiti o faiaoga o loo tālia faamaoniga e mafai ai ona faamuta le faanofoesea ma o loo fesootai pea ma le soifua maloloina.
O le tagata matua foi o le aiga o le tamaititi aoga faapea le tamaititi aoga na maua i le misela o lea ua uma aso sa faanofoesea ai.
